Citizen Science sa numna la participaziun da laics a la rimnada da novas enconuschientschas scientificas.

Cun quai surpass’ins ils cunfins tranter la perscrutaziun academic-universitara e quella extrauniversitara. Citizen Science è in grond potenzial da creativitad per la perscrutaziun e promova l’acceptanza e la capacitad da las burgaisas e dals burgais da valitar projects da perscrutaziun.
Grazia al svilup tecnic rimnan laics adina dapli datas relevantas per la perscrutaziun ordaifer labors da perscrutaziun, ed adina dapli datas èn accessiblas a la publicitad. Uschia perdan instituts da perscrutaziun academics lur monopols da la rimnada da datas, da l’access a datas e da l’interpretaziun da datas ch’els avevan fin qua. La digitalisaziun ha per exempel per consequenza che las pazientas ed ils pazients pon sa participar en la rait sco experts da lur malsognas. Quai permetta ad els d’entrar en in dialog cun scienziads e da prender influenza sin la perscrutaziun.
En «Ally Science» sa furma ina community dad allergicras e d’allergichers da pollens che contribueschan activamain a la perscrutaziun d’allergias nudond lur sintoms d’allergias. Las datas anonimisadas evaluadas e connectadas cun datas da l’ambient e geodatas creeschan in stgazi da datas che pussibilitescha da perscrutar e che stat il medem mument a disposiziun a la community sco evaluaziun en temp real. Cun la community dad «Ally Science» vegn creada ina basa per ulteriurs projects che permettan ina rolla anc pli activa dals participants: l’app dad «Ally Science» è concepida uschia ch’ella permetta numerusas dumondas en connex cun l’allergia da pollens. Per la segunda fasa il 2019 integreschan ils perscrutaders ulteriuras dumondas, uss èn era giavischads inputs da la community «Ally Science». Utilisaders interessads èn supplitgads d’entrar en contact cun il team da project.